Ager, diuendres 19 de mai, eth Sindic d'Aran, Carlos Barrera, convoquèc ua amassada que compdèc damb era preséncia de toti es bailes dera Val d'Aran, atau coma damb eth personau des servicis tecnics e juridics deth Conselh Generau. Er objectiu d'aguesta reunion ère debàter sus er urbanisme en territòri e sus es cambis que s'an produsit enes darrèri ans en marc legislatiu e normatiu en matèria d'organizacion deth territòri.

Pendent aguesta jornada de debat, un des aspèctes tractadi siguec qu'entath desvolopament deth Plan Director Urbanistic dera Val d'Aran cau auer en compde mesures coma era adaptacion des Nòrmes Subsidiàries as determinacions d'aguest Plan Urbanistic e ena legislacion urbanistica o era redaccion deth Plan Especiau Urbanistic deth Garona.

Aguest conjunt d'estruments permet méter ath dia aspèctes tan importants coma era regulacion des edificacions e es emplecs, era incorporacion de critèris e paramètres d’inundabilitat, accessibilitat, intervencion de Pompièrs e Proteccion Civiu, sostenibilitat e entorns de proteccion patrimoniau.

Enguan se complís eth 35au aniversari dera aprobacion des Nòrmes Subsidiàries dera Val d'Aran, figura principau ena preservacion e eth desvolopament deth territòri. Un des objectius d'aguesta amassa, ère profitar entà aprigondir ena possibilitat d'analisi e adaptacion ath marc normatiu en vigor.

Actuauments ei procès de desvolopament era Modificacion des Nòrmes Subsidiàries relatives as bòrdes e cabanes, ua prepausa formulada coordinadament peth Conselh Generau d’Aran damb eth conjunt d'Ajuntaments dera Val d’Aran. Eth Plan Especiau Urbanistic deth Garona se trape tanben en periòde de redaccion.

IMATGE: CONSELH GENERAU D'ARAN