Pendent er acte de precampanha deth PSC celebrat aguest dissabte en Era Audiovisuau de Vielha, a on i sigueren presents ua bona representacion des candidats dera formacion socialista entàs eleccions deth 21 de Deseme, eth candidat ara presidéncia dera Generalitat de Catalonha, Miquel Iceta, afirmèc eth sòn compromís de milhorar eth finançament, eth reconeishement constitucionau e un tracte institucionau avient entara Val d’Aran.

Pera sua part, eth candidat numerò 1 per Lhèida, Òscar Ordeig, parlaue d’ipocrisia quan quauques formacions catalanes acusauen a d’auti d’abandon e mautractament, mentre qu’èren eri qui auien deishat de costat ara Val d’Aran, sustot a nivèu institucionau.

Er acte tanben compdèc damb eth secretari generau d’Unitat d’Aran, Paco Boya, eth baile de Lhèida, Àngel Ros, atau coma eth candidat numerò 3 per Barcelona, Ramon Espadaler, que defenèc era politica de dialòg entre es formacions qu’an desparièr color e ideologia.

Fin finau, era candidata numerò 6 per Lhèida, e membre d’Unitat d’Aran, Maria Vergés soslinhaue qu’era Val d’Aran a estat desbrembada en tot eth procés independentiste, e qu’es diputats aranesi pendent aguesta legislatura non an hèt arren per aranés.

Vergés remerquèc era bona entesa que i a entre eth PSC e es cristiano-democrates, qu’en aguest cas se presenten coma Units Per Avançar, e que pendent aguesta legislatura municipau, van dera man en ajuntament de Vielha e Mijaran, e que demoren boni resultats entath pròplèu 21 de Deseme.