Pendent era celebracion deth 39au Congrès Federau deth PSOE qu'a finalizat aguest 18 de junh en Palai Municipau de Congressi de Madrid, s'a aprovat era naua executiva dera formacion socialista que lidere Pedro Sánchez. Aguesta naua executiva a artenhut eth 70,5% des vòts, damb 674 vòts a favor, 274 en blanc e 8 nuls. Destaque, era preséncia de Paco Boya, secretari generau d'Unitat d'Aran, coma nau responsable dera Secretaria de Montanha. "Sajarè d'èster ara nautada d'aguest nau nomentament e trebalharè pera gent que viu enes zònes de montanha", comentaue Boya. 

Pedro Sánchez dejà li auie assegurat a Miquel Iceta, Prumèr Secretari deth PSC, qu'era formacion catalana compdarie damb 3 membres ena sua executiva. En aguest cas, a Boya, se li junhen Carles Ruiz, baile de Viladecans, qu'ei eth nau secretari d'Indústria, Comèrç e Torisme, e Nuria Parlon, bailessa de Santa Coloma de Gramanet, qu'ei era naua secretària de Coesion Sociau e Integracion.



IMATGE: Facebook de Paco Boya