Vielha e Mijaran poirie abilitar es bòrdes e cabanes a cèrts usi toristics. Eth Plen municipau a desestimat era mocion presentada peth grop dera oposicion de Convergéncia Democratica Aranesa sus era regulacion d’aguesti equipaments, ena que se pretenie esvitar que se pogue optar a hèr un emplec d’aguestes bastisses damb quinsevolh us torístic. Era preocupacion se produsís damb era ampliacion deth concèpte lúdic-familiar, pr’amor que entenen que se poirien daurir restaurants, e ac an qualificat coma ua mercantilizacion des bòrdes e cabanes preexistentes.

D’aute biais, eth govèrn d’Unitat d’Aran s’a opausat ara mocion en tot argumentar qu’encara manque marge de temps entà presentar allegacions ara prepausa iniciau enquiath 4 de seteme.

En municipi de Vielha e Mijaran ei proïbit er emplec des bòrdes e cabanes damb us otelèr e torisme rurau. Tot e atau, non se escarte presentar prepauses alternatives abantes de que s’acabigue eth termini d’allegacions.

Per contra, Convergencia parle d’un modèu unic de país, a on se preserviguen es actiuetats istoriques e eth patimòni, e demoren que des deth govèrn non decidisquen optar per un aute camin.

Enquiath 4 de seteme i a marge entà presentar allegacions, e de ben segur qu’a titol individuau o d’administracion se’n presentaràn diuèrses. De manèra, qu’eth tèxte finau non serà eth que i a ara aprovat per unanimitat en Conselh Generau d’Aran.