Ua trentia d’aranesi se concentrèren ena Plaça dera Glèisa de Vielha era tarde de dijaus, 16 de noveme, entà demanar era libertat des líders dera Assamblea Nacionau Catalana e Òmnium, Jordi Sànchez e Jordi Cuixart, tot just quan se complie un mes deth sòn empresonament.

Rebrembam qu’ambdús entrèren ena preson de Soto del Real eth passat 16 d’octubre per un supausat delicte de sedicion.

Pendent aguest mes an estat fòrça nombrosi es actes enes quaus s’a demanat era libertat des Jordis, atau coma era des conselhèrs dera Generalitat, empresonats eth passat 2 de noveme, toti eri considerats per part dera poblacion catalana e aranesa coma presoèrs politics d’ua democràcia deth sègle XXI.

Per ara, ena Val d’Aran se contunhe hènt seguiment, damb mes o mens participacion, de toti es actes relacionats damb era libertat de Catalonha e des sòns presoèrs.