Era nhèu e er heired seràn presents ena Val d’Aran pendent quauqui mesi encara, ei per açò madeish qu’ei fòrça important que, tant residents coma visitants, siguen adequadament premanits entàs conseqüéncies que pòden auer aguestes condicions meteorologiques.

Parlam damb pompièrs especialistes entà que mos expliquen quini son es passi a seguir quan premanim ua gessuda en iuèrn.

Quan realizam bèra activitat en aire liure, ei fòrça important hèr a saber a bèth un a on vam e guaire temps i seram.

Damb es veïculs cau portar tostemp arròdes de contacte e shènes, e èster prudents enes carretères.

En çò que tanh as abitatges, es pompièrs mos rebremben qu’ei fòrça important era neteja des chemenèies e tier compde damb es aparelhs electrics.

Aguesta ei ua sèrie de recomanacions fòrça simple mès que mos pòt evitar mès d’un espant aguest iuèrn. Se pòt gaudir dera nhèu de forma segura e preveir incidents damb un shinhau de preparacion.