Telefónica dejà a iniciat era prumèra fasa deth desplegament dera fibra optica en municipi de Vielha e Mijaran.

Eth Plan d'Implementacion d'aguest nau servici se realizarà en diuèrses fases e anualitats, entà acabar dant cobertura ara totalitat deth municipi. 

Entà poder realizar aguesta implementacion ei de besonh desplegar un nau cablejat, tant aerian coma soterrat, per totes es vies urbanes municipaus.

Entad aguest trebalh se profitaràn totes es canalizacions existentes entà passar aguesti naui cables des dera centraleta telefonica principau, e dempús anar-la estenent ara rèsta de pòbles. 

Es trebalhs d'aguesta prumèra fasa se centren en adaptar era centraleta de Vielha e crear er hilat d'alimentacion que permeterà distribuir era fibra optica a trauès d'un nau cablejat. 

Ja hè un an qu'eth còsso de Naues Tecnologies der Ajuntament de Vielha e Mijaran, Alberto López, s'amassèc damb es responsables dera enterpresa Telefonica en Barcelona entà reclamar era arribada dera fibra optica en municipi. Aué, aguesta realitat semble mès a pròp que mai. 

Segontes afirme López, "era implantacion dera fibra optica se convertirà en motor dera emprendedoria, donques ajudarà a méter en  marcha nombrosi projèctes d'innovacion, atau coma a generar naues oportunitats laboraus qu'enquiara non èren possibles. Ath delà, era fibra optica ei estretament estacada damb eth benèster economic sociau e toristic".