Eth modus operandi qu'utilizauen es lairons tostemp ère eth madeish. Escuelhien cases unifamiliars, principauments es zònes ruraus e a on viuie gent d'edat auançada, enes quaus es proprietaris deishauen es pòrtes d'accès daurides pendent eth dia o non amagauen es claus en exterior dera casa. En aguesti casi, es lairons sabien a on ère er amagatalh, utilizauen es claus e les tornauen a deishar en madeish lòc entà non lheuar sospèites. Un còp laguens, sostreien jòies e sòs en efectiu.

Aguesta manèra d'actuar favorie que fòrça victimes iniciauments non siguessen conscientes des panatòris donques que non forçauen cap des accèssi.

Tà véner eth materiau sostret es integranti d'aguest grop se desplaçauen entà Lhèida, luenh dera Val d'Aran, e les venien a establiments de compravenda de jòies.

Dera investigacion se desprenec qu'era principau suspècta serie ua vesia de Vielha, que coneishie perfèctaments es circonstàncies dera zòna donques qu'auie trabalhat en tot netejar cases.

Un còp analisadi es registres des establiments de compravenda d'aur, er entorn dera autora principau, e arrecuelhudi es indicis sufisents, eth passat dimèrcles se montèc un dispositiu entà detier es lairons.

Pendent era maitiada se hec ua entrada e perquisicion en abitatge dera principau suspècta en Vielha. En operatiu se detengueren cinc persones, tres hemnes e dus òmes, e se recuperèren nombroses jòies.

As detenguts se lis restaque damb sies panatòris damb fòrça e quate raflades, cometudi en Vielha, Garòs, Betren, Escunhau e Casarih e tanben damb cinc entrades en viuenda alièna donques qu'en quauque casi auien entrat enes cases sense arribar a sostrèir arren. Eth valor conjunt des jòies sostretes ascendís mès enlà de 100.000 èuros.


HÒNT: MOSSOS D'ESQUADRA