Baqueira-Beret a barrat es vacances de Nadau damb ues excellentes chifres d’esquiaires. Segontes a informat era estacion d’esquí aranesa, pendent es 15 dies hestius, lèu 150.000 esquiaires passèren pes pistes entre eth 25 de deseme e eth 7 de gèr. En aguest periòde, Baqueira-Beret aufric ua mejana de 130 kms esquiables e toti es remontadors en foncionament.

Eth 30 de deseme siguec eth dia que mès esquiaires s’enregistrèren ena estacion, ath tor des 21.000. Son donades que mòstren era grana sason d’iuèrn qu’enquiara s’amie a tèrme ena Val d’Aran, pr’amor qu’autant en Pònt dera Purissima de deseme coma tà Nadau, er estacion disposèc d’ua bona qualitat de nhèu enes 3 sectors: Baqueira, Beret e Bonaigua. Enquiath darrèr dia de vacances, era estacion acumulaue celhs d’enquia lèu 2 mètres de nhèu enes còtes mès nautes.

Pendent eth mes de gèr, Baqueira-Beret aufrirà prètzi especiaus as esquiaires, pr’amor qu’acostume a èster un mes de transicion enquia hereuèr, a on damb era hestivitat de Magràs, se tornarà a recéber a ua bona quantitat de visitaires.