Aguest dimars, un joen excursionista d'Israel, de 28 ans, a morit en Espitau Arnau de Vilanova de Lhèida, a on siguec ingressat en estat critic dempús d'èster rescatat per ipotérmia. Era victima, amassa damb ua auta joena israeliana de 26 ans, sigueren rescatats en circ de Colomèrs, mentre realizauen era rota Carros de Foc, e des de dissabte passat s'auien perdut. 

Ath tor des 3 dera tarde, es Bombers dera Generalitat receberen er avís. Era gojata podec avisar a diuèrsi pagesi que i auie pera zòna. Enquiath lòc der eveniment s'i desplacèren equipes de rescat des Pompièrs d'Aran, Mossos d'Esquadra e Bombers dera Generalitat. Eth joen excursionista un viatge rescatat, siguec trasladat en elicoptèr deth SEM, en estat critic, enquiar Espitau Arnau de Vilanova de Lhèida, a on fin finau moric. 

Era gojat siguec trasladada en ua ambulància deth SEM enquiar Espitau Val d'Aran de Vielha tanben damb simptòmes d'ipotérmia, mès eth sòn estat non ère pas autant de grèu. Segontes comentèc era pròpia excursionista, aurien estat en tot dromir des de dissabte en ua zòna damb temperatures de -1,5 grads.