Tath torn des 12:30 deth dia d'aué i a agut un accident en quilomètre 104 dera N-230, ara nautada d'Arén de Noguera. Un camion a quedat bolcat ena carretèra, talhant atau eth transit enes dus sentits dera marcha e barrant er accès ara Val d'Aran enquias 15:05 dera tarde. 

Eth Síndic d'Aran, Carlos Barrera, a manifestat era sua preocupacion dauant as reïteradi accidents de veïculs de transpòrt pesat ena N-230, e afirme qu'aguesta via a arribat ath punt deth collapse degut a que supòrte eth pas de mès de 500 camions de granes dimensions jornalièraments.

Aguest hèt hè ara via incompatible damb eth transit des coches que s'adrecen entà visitar eth nòste territòri. 

Hè uns mesi eth Sindic assistic a ua reünion ena Deputacion de Lhèida a on es assistents meteren dessús dera taula era sua grana preocupacion pera inseguretat vial en aguest tram e era incompatibilitat entre era densitat deth transpòrt pesat e er accès a d'aguesta zòna, a on es sòns ingrèssi basadi enes servicis e eth torisme.

A compdar d’aguesta reünion eth Conselh prenec era decision d’encargar un estudi de melhora deth tram entre Arén e era boca sud deth tunèl de Vielha, centrant-se, sustot, en cercar trams entath bastiment d’un tresau carril destinat ath transpòrt pesat e hèr possible es auançaments de torismes sense méter eth risc era sua seguretat.

Aguest projècte se tròbe ores d’ara en ua fasa fòrça auançada de redaccion entà presentar-lo adès de finaus de seteme as Servicis Tecnics dera Deputacion de Lhèida.

Era prepausa cerque minimizar er impacte ambientau, optimizar es trams a on eth bastiment deth tresau carril represente ua inversion sostenible e generar trams de d’auançaments segurs.

Barrera, hig que “era frequéncia d’accidents de veïculs pesats mos hè a díder damb tota rotonditat, qu'aguest tram dera N-230 ei absoludaments incompatible damb un accès deth sègle XXI as territòris deth Pirenèu de Lhèida”.