Un an mès, torne era celebracion de Santa Quitèria

21/05/2017

Dejà a agut lòc era tradicionau Romeria de Santa Quitèria en refugi der antic espitau, plaçat ena boca sud deth Tunèl de Vielha.

Er acte, organizat per Ajuntament de Vielha e Mijaran en collaboracion damb Alsa, Aran-Thal e er APA deth CEIP Garona, començaue tàs 10:30 damb un esdejoar popularTàs 12:00 auien lòc era tradicionau missa en aunor a Santa Quitèria, era benediccion deth tèrme e repartiment deth pan e er hormatge. Ara seguida començauen era animacion damb era Charanga Helveticos e es activitats infantiles a cargue d’Aran-Thal enquiath començament deth dinar popular tàs 14:00. E fin finau, tàs 16:00 auie lòc eth balh de tarde.

Era hèsta de Santa Quitèria amasse ena boca sud deth Tunèl de Vielha ara gent d’Aran e Ribagorça des deth segle X quan, dempús d’auer acabat er iuèrn, dejà se podie crotzar a pè eth pòrt de Vielha, unic accès entre es dus parçans.

Tot e qu’encara i a gent qu’ac hè, ara ja non ei necessari crotzar a pè aguesta distància e, entad aguest eveniment toti aqueri qu’ac volguen pòden agarrar un des autobusi Alsa gratuïts que gessen tàs 10:00 e es 11:00 deth maitin de Vielha e tornen des der aute costat deth tunèl tàs 18:00 e 19:00 dera tarde.

Ua tradicion milenaria qu’enguan a tornat a amassar a ua grana quantitat de persones, qu’erosament an gaudit d’un bon dia en tot minjar, dançar e arrir en companhia des sòns vesins aranesi e ribagorçans.

Clara Villar