Ager, 29 de junh, auec lòc ena sedença deth Conselh Generau d’Aran era charrada “Torisme e naues tecnologies: Era economia aranesa deth segle XXI”, impartida peth fondador, project manager e data scientist d'OcSTEM Solutions, Jacint Berengueras.

Pendent aguesta charrada, dubèrta a toti es interessats e ara qu’anèren diuèrses persones relacionades damb eth sector toristic, se parlèc dera importància qu’a entath torisme eth recuelh de tot tipe de donades e eth posterior analisis d’aguesta informacion.

Se tracteren tanben es febleses e fortaleses deth sector, atau coma era aplicacion deth big data, era realitat aumentada, eth blockchain e era experiéncia d’usuari, entre d’auti temes.

Non i a cap dubte de qu’eth futur deth torisme passe pera aplicacion d’aguesti metòdes tecnologics e des dera Val d’Aran ei imprescindible era existéncia de figures qu’agen es coneishements entà aplicar-les.