Ena Val d'Aran contunhe en tot aumentar era chifra d'estatges e cases que son abitatges d'us toristic. Aué, segontes afirme eth Conselh Generau d'Aran, n'i a mès de 620. Segontes comente era conselhèra de torisme dera Val d'Aran, Anna Diaz, "açò supause un aument deth prètz des loguèrs e limite es opcions entà trapar ua residéncia". E, ahigís qu'"era regulacion ajude a que i age açò e permet regular-lo". 

D'aute biais, i a ajuntaments qu'an decidit gravar aguesti naui establiments entà limitar-les. Aguest ei eth cas der ajuntament de Vielha e Mijaran, qu'en 2016 aprovèc un aument dera taxa de dubertura d'aguesti establiments, en tot pujar des 75 € iniciaus a 600, entà frenar-les. Eth baile de Vielha e Mijaran, Juan Antonio Serrano, afirme qu'"era màger part d'aguest tipe d'abitatges de Vielha, son de gent que viu dehòra, de sòrta qu'era renda lèu non repercutís aciu". Era pujada deth prètz deth loguèr en darrèr an s'estime en un 30%. 

Serrano manifèste era sua preocupacion pr'amor que tanben la considère ua competéncia desleiau e "es entepreses toristiques cada viatge an mès problèmes en contractar personau pr'amor dera distància damb d'autes poblacions. Ei un gran problèma e pòt èster encara mès gran".

Er ajuntament de Vielha e Mijaran a detectat locaus comerciaus e burèus abilitadi tà sojorns. E, er ajuntament de Naut Aran, tanben a detectat que i age garatges damb aguesta foncion.