Es càmpings son ua des actiuetats toristiques mès demandades ena Val d’Aran damb era arribada der ostiu. Arraïtz des aiguats de 2013, era sua situacion legau se vedec comprometuda, pr’amor que 7 des 8 càmpings deth territòri se trapen en çò qu’era Confederacion Idrografica der Ebre nomente coma zòna de fluxe preferent. Açò vò dider, auer era sua actiuetat economica a pòqui mètres deth lhet deth riu. Hè tot just dus ans es càmpings se planhèren, pr’amor qu’era màger part an es papèrs en regla e sentien impoténcia deuant dera menaça dera CHE de provocar eth sòn barrament. Parallelaments, eth Conselh Generau d’Aran elaborèc un estudi tecnic que presentèc ara CHE ara hè un an, entà que varièsse era sua concepcion sus es zònes inondables dera Val d’Aran.

Dus càmpings dera Val d’Aran vederen coma se lis daurie un expedient justaments per aue desvolopat prètzhèts de milhora dempús des aiguats, mès era CHE decidic prorogar eth temps entà començar a dar era orde de sancionar-les. Maugrat era situacion d’incertitud que se provòque deuant era manca d’actuacion dera CHE, encara se demore qu’er organisme estatau dongue ua responsa ad aguesta qüestion.

Tot e açò, eth Conselh Generau d’Aran, qu’ei er interlocutor des càmpings damb era CHE, assegure qu’era sason d’ostiu seguirà coma s’a hèt enquiara, sense qu’agen de patir pes possibles multes o sancions futures per part dera CHE.