Eth nombre de visitants en Bagergue aumente un 22'46%

01/09/2017

Segontes es donades deth registre voluntari plaçat ena Glèisa de Bagergue, eth pòble a arrecebut pendent eth mes d'agost d'enguan un 22'46% de visitants mès qu'en madeish mes der an anterior, e un 57'88% mès qu'en agost de 2015.

Eth baile dera EMD de Bagergue, Marc Tarrau, s'a congratulat per aguest aument "tan significatiu" des donades de visitants. Aguest increment, ditz, "s'explique pera apòsta decidida ena qualitat dera auferta toristica qu'aufrissen es establiments de Bagergue, era promocion continuada deth pòble damb era maximala distincion coma "Vila Florida", per toti es atractius toristics qu'aufrís e peth simple hèt de passejar per un pòble florit, net e suenhat. Aguesta ei era imatge qu'a d'aufrir, non sonque Bagergue, senon tota era Val d'Aran".

Pròp de 5.000 persones an visitat aguest pòble, qu'en 2016 artenhec era maximala distincion de "Vila Florida" damb 4 Flors d'Aunor. 

Des d'alavetz Bagergue a imprès e distribuit mès de 8.000 triptics toristics en otèls, apartaments e oficines de torisme, a participat ena creacion e promocion dera campanha "Viles Florides deth Pirenèu de Lhèida" amassa damb Rialp, Vilaller, Canejan e la Seu d'Urgell e a creat era "Ruta des Espaci Floridi", pera quau s'an consumit mès de 2.000 mapes que permeten recórrer e visitar es espacis e cornèrs floridi de Bagergue

Ath delà, s'a procedit tanben ara potenciacion dera zòna d'escalada damb era creacion de "Ròca Aran" e s'a includit era Glèisa de Sant Fèlix de Bagergue (sègle XII) ara Rota Romanica d'Aran.

Açò, amassa damb era sua aufèrta gastronomica e otelèra e d'auti productes coma es Circuits d'Orientacion, era Hormatgeria Tarrau o eth Musèu Eth Corrau, hèn de Bagergue un pòble fòrça atractiu damb moltes alternatiues toristiques entàs visitants.

IMATGE: JAUME BOLDÚ

Clara Villar