Un an mès, era Val d'Aran serà present ena grana hèsta deth producte e era gastronomia "Mercat de Mercats", celebrada en Barcelona entre es dies 20 e 22 d'octubre. 

Aran participarà coma collaborador en tot dar a conéisher era gastronomia aranesa en aguesta hèira pensada entà promòir es productes de qualitat e proximitat que se pòden trapar en tota Catalonha.

Eth "Mercat de Mercats 2017", qu'enguan celèbre era sua 8au edicion, amplirà d'aulors, sabors e colors eth cap-lòc catalan, e entre toti es productes se poderàn trapar es dera Mèrca de Garantia dera Val d'Aran. 

Era Escòla d'Ostalaria de Les-Val d’Aran elaborarà diuèrsi plats damb productes dera Mèrca de Garantia, coma per exemple era Òlha Aranesa.

Aguest mercat, en quau se demore era assisténcia de mès de 260.000 persones, includís diuèrses activitats en un unic espaci damb preséncia de productors, comerçants e codinèrs, e permet apropar as ciutadans de manèra ludica e pedagogica es melhors productes dera tèrra.

IMATGES: CONSELH GENERAU D'ARAN