Er Ajuntament de Bossòst amie a tèrme ua reforma integrau deth cementèri

29/01/2025

Entre eri, en destaquen era repavimentacion der espaci, naui punts de lum, milhora deth subministrament d'aigua o tornar a hèr eth mur perimetrau

Er Ajuntament de Bossòst amiarà a tèrme ua intervencion integrau en cementèri municipau gràcies a ua subvencion de 172.000 èuros que provien dera Deputacion de Lhèida.

En aguest sens, es principaus actuacions se basaràn en milhorar eth solèr deth recinte, pr’amor que i a quauques rajòles trincades o des·hètes, se restaurarà eth mur perimetrau perqué se trape en un estat maumerent a on i a ua part esbaussada, méter punts de lum entà poder auer er espaci fòrça milhor enlumenat, sustot enes moments dera tarde o era net o potenciar eth subministrament d’aigua a on i a a dia d’aué ua hònt mès non se trape enes condicions avientes. 

Eth consistòr a explicat que se garantirà atau auer un espaci mès digne e respectuós entàs difunts e es sues familhes.

Cau rebrembar qu’en an 2018, dera man der aute equip de govèrn, se bastiren 56 cavòts naui e 20 columbaris en ua inversion qu’ascendic as 100.000 èuros en tot incluir còsti d’urbanizacion e bastiment d’aguest mur perimetrau que precisaments ei miei queigut.

Aguesta ampliacion supausèc un besonh urgent, pr’amor qu’era capacitat d’acuelhuda der actuaument cementèri se trapaue lèu agotada. Eth convèni gessec endauant gràcies ar acòrd damb un vesin que colindaue era sua finca.

Àlvar Ordoñez