Er Institut d’Estudis Aranesi-Acadèmia Aranesa dera Lengua Occitana reclame es resultats d’usatge lingüistic e sociau der aranés ena Val d’Aran, que hè dejà fòrça mesi aurien d’èster publics segontes afirme aguesta institucion.

Es donades es darrèri ans an queigut en picat drasticaments, en tot plaçar es chifres en un 18% d’usatge sociau, quauquarren tanplan baish e que preocupe a totes es entitats, govèrns locaus e partits politics e que se vò capvirar damb politiques de promocion e difosion dera lengua.

Era Acadèmia s’a aufrit publicaments entà poder milhorar aguesta complèxa situacion en tot lutar pera perviuença der aranés, mès expliquen qu’era politica lingüistica correspon ara Generalitat de Catalonha e ath Conselh Generau d’Aran.

Er impuls a nivèu online e escrit s’a notat fòrça damb eth naishement de naui projèctes vinculadi ara lengua, autant coma publicacions e escrits enes diuèrsi estaments, mès er usatge en carrèr ei, a dia d’aué, era assignatura pendenta en territòri.