Ena amassada, Serrano a demanat ara Cambra era sua collaboracion entà poder exigir ara Generalitat de Catalunya que trabalhe en foment de viuenda protegida, pr'amor que i a fòrça dificultats entà qu'es trabalhadors trapen abitatge assequible, hèt que dificulte tanben qu'es enterpreses poguen daurir negòcis en territòri. Atau madeish, tanben s'a parlat sus eth besonh d'auer solèr industriau, que tanben milhorarie era situacion empresariau en Vielha e Mijaran. 

"Trabalham entà que Vielha, coma cap-lòc dera Val d'Aran, pogue aufrir mès viuenda protegida as trabalhadors pendent tot er an, e per aquerò ei de besonh qu'es administracions politiques, sustot era Generalitat de Catalunya, ajuden a qu'açò sigue possible", comente Juan Antonio Serrano.

Des der Ajuntament de Vielha e Mijaran s'aufrís era collaboracion institucionau ara Cambra de Comerç de Lleida entà mantier era collaboracion entà fomentar activitats qu'ajuden a desvolopar eth teishit empresariau en municipi.

Tanben s'a profitat era amassada entà visitar eth Centre d'Innovacion Territoriau (HèPic).


HÒNT: AJUNTAMENT VIELHA E MIJARAN