Eth Plen deth Conselh Generau d’Aran a aprovat per unanimitat autrejar eth Prèmi 17 de Junh 2024 ath freerider dera Val d’Aran en reconeishement e arregraïment ara sua aportacion en favor deth territòri.

“Aymar Navarro a representat pendent tota era sua trajectòria esportiva es valors qu’es prèmis 17 de Junh simbolizen, per èster ua figura de referéncia ena Val d’Aran e un ambaishador dera nòsta tèrra, non sonque a trauès der espòrt de nhèu, senon damb eth sòn compromís damb eth nòste país, ath qu’a representat damb orgulh e dignitat per tot eth mon”, en paraules dera sindica d’Aran, Maria Vergés.

Pionèr deth FreeRide en Espanha, siguec eth prumèr espanhòu en participar en Freeride World Qualifier, a on se classifiquèc entre es 12 prumèrs deth mon.

Maria Vergés a soslinhat que: “mès enlà des sòns rèptes esportius, Aymar Navarro subergés pera sua implicacion damb eth territòri, eth sòn compromís damb eth respècte e eth suenh der entorn, era promocion d’ua practica esportiva segura e responsabla ena montanha e era sua persevarança e tenacitat entà superar es trebucs, çò que lo convertís en un exemple a seguir, sustot pera joenessa aranesa, qu’a trapat en eth un referent damb ua dimension umana e uns valors que les servissen d’inspiracion”.

Volem rebrembar qu’es prèmis 17 de Junh, qu’an caràcter de prèmis nacionaus d’Aran, an era finalitat de reconéisher e arregraïr annauments as persones, collectius o entitats que, pes sòns merits an subergessut pes servicis prestadi ara Val d’Aran enes diuèrsi sectors ena vida sociau, culturau, esportiva o economica, en tot dignificar es sòns pròpris encastres e aunorar eth país.

Er autrejament d’aguest guerdon se harà en acte institucionau dera celebracion dera Hèsta d’Aran, deluns que ven 17 de junh, tàs 12 ores, en Mijaran.


HÒNT: CONSELH GENERAU D'ARAN