Irati Cuadrado e Sadurní Betriu guanhadors dera 45au edicion dera Marxa Beret

03/02/2025

Ua pròva qu'a compdat damb era participacion de 700 fondistes e damb quate distàncies a escuélher: 5, 10, 21 e 42 quilomètres

700 persones an participat d’aguesta 45au edicion dera Marxa Beret, era corsa d’esquí de hons mès importanta de tot er Estat e ua des mès destacades deth sud d’Euròpa.

Es jornades anteriors nheuèc fòrça en territòri en tot deishar ues espectaculares condicions que coincidiren damb un solei que siguec present ath long de tota era corsa en tot mostrar imatges espectaculares des participaires peth plan de Beret.

En totau i auie 4 distàncies, era Mini Marxa Beret, de 5 km, era pròva de 10km, era mieja maraton, que se redusic enquias 18km e era maraton, qu’enguan siguec de 31 km. Cau rebrembar qu’aguestes dues darrères pròves formauen part deth Campionat d’Espanha de Longa distància.

Ena categoria femenina era guanhadora siguec era navarresa Irati Cuadrado que s’imposèc a Marta Cester, esportista aranesa, e a Laura Orgué, olimpica en Sochi.

Ena categoria masculina, Sadurní Betriu guanhèc era corsa en tot hèr ua grana demostracion en Beret, per dauant de Diego Ruiz e Oier Ibergallartu.  Coma donades curioses, en destaque era participacion de Joan Navarra, de 85 ans, e qu’a pogut participar en totes es 45 edicions que s’an amiat en complèx aranés.

Era pròva ei organizada peth Conselh Generau d’Aran, amassa damb Baqueira Beret, era Real Federación Española de Deportes de Invierno e era Federació Catalana d’Esports d’Hivern.

Àlvar Ordoñez