Era Sindica s’a amassat en Madrid damb eth secretari d’Estat d’Abitatge e Agenda Urbana, David Lucas, a qui a trasladat era preocupacion deth govèrn d’Aran pera situacion provocada pera manca d’abitatge accessible en nòste territòri. Ua problematica  qu’afècte non sonque tàs residents locaus, senon que tanben empedís eth desvolopament sostenible dera comunautat aranesa e met en risc era prestacion de servicis publics. 

Maria Vergés a explicat ath secretari d’Estat qu’eth govèrn d’Aran a impulsat, amassa damb bona part des ajuntaments aranesi, eth “Plan d’Abitatge d’Aran”, qu’entre d’autes donades, a metut de manifèst que sonque eth 38% der abitatge existent en Aran se dedique a abitatge abituau, en tot deishar ath descubèrt un gran nombre d’abitatges destinadi a segones residéncies e a usatge toristic, que provòquen un increment des prètzi deth loguèr, que s’an doblat en un an

En aguest sens cau rebrembar qu’eth Conselh hè temps que reclame  ara Generalitat de Catalunya deth traspàs deth domèni competenciau que en aguesta matèria reconeish era Lei de Regim Especiau dera Val d’Aran. Era situacion non sonque afècte as vecinos dera Val d’Aran, senon tanben as persones que vòlen trabalhar en territòri e non trapen lòc tà residir pendent er an.