Ena agenda culturau entad aguest ostiu non pòden mancar es activitats musicaus qu’acuelh eth nòste patrimòni e qu’enguan compdarà damb un nau cicle de concèrts. Eth Departament de Torisme, Promocion Economica e Comèrç deth Conselh Generau d’Aran a creat un programa de quate concèrts entàs diuendres d’aguest mes d’agost damb composicions damb diuèrsi estils musicaus.

Eth prumèra actuacion aurà lòc eth diuendres 8 d’agost, ena glèisa dera Mair de Diu deth Rosèr d’Es Bòrdes damb eth Quartet Teixidor de còrda, tàs 20.00 ores.

Eth Quartet de còrda e flaüta Prysma aufrirà un vast repertòri ena glèisa de Sant Fèlix de Vilac eth diuendres 15 d’agost, tàs 19:30 ores.

Ua tresau interpretacion musicau amassarà, ena capèla de Sant Blas de Les, eth quartet espirituau nere Black Birds eth diuendres 22 d’agost tàs 19:30 ores.

Aguest cicle de concèrts d’ostiu se barrarà eth diuendres 29 d’agost damb eth trio de còrda e piano Pop Piano Quartet, ena glèisa de Sant Julian de Garòs.

Toti es concèrts d’aguest Cicle d’Ostiu son gratuïts e tà toti es públics.


HÒNT: CONSELH GENERAU D'ARAN