Amassada des professionaus d’Aran Salut damb familiars des usatgèrs dera residéncia geriatrica Sant Antòni de Vielha

Aué auem celebrat ua amassada damb es familhaus des persones que demoren ena residéncia de Sant Antòni de Vielha e es persones usatgères deth centre de dia, entà presentar es naues professionaus que s’an incorporat darrèraments: era terapeuta aucupacionau e era directora suplenta e exposar-les es cambiaments organizatius d’ençà dera implementacion deth modèl “Atencion Centrada ena Persona” (ACP) que met en centre es persones en tot tier en compde es sòns interèssi, preferéncies e decisions ara ora d’establir eth sòn plan d’atencion.


Aguesta amassada a estat fòrça ben arrecebuda pes familhaus que lèu i an assistit toti e an arregraït era convocatòria e auer era oportunitat de tractar aspèctes que les preocupen atau coma implicar-les enes dinamiques d’atencion as sòns familhaus residents. Era reünion a estat dinamizada per tota er equip tecnic professionau dera residéncia qu’a explicat eth detalh des dinamiques e activitats que darrèraments s’an implementat.


S’a acordat que de manèra periodica se convocaràn amassades d’aguest tipe entà integrar eth trabalh deth modèl ACP tanben damb es familhaus e constituïr ua comunitat d’atencion as persones granes d’ençà dera confidança, era melhora contunhe dera qualitat assistenciau e fòrtaments coesionada.


HÒNT: ARAN SALUT