Campanha entà prebotjar eth civisme en Vielha e Mijaran

Jos eth lèma “Eth carrèr, un espaci de toti e entà toti”, er Ajuntament de Vielha e Mijaran a iniciat ua campanha entà promòir eth civisme e era convivéncia ciutadana en conjunt deth municipi, damb era quau eth consistòri preten qu’era ciutadania prengue consciéncia dera importància deth suenh des espacis publics.

Era intencion ei arténher qu'era gent s'implique enes ahèrs publics dera vida vidanta coma ei eth respècte pes installacions, eth suenh des carrèrs, portar es cans estacadi, respectar eth descans des vesins o emplegar es trepaders entà caminar, entre d'autes accions.

Segontes era dusau tinent d’alcalde, Maria Vergés, “damb aguesta campanha volem arténher era implicacion dera ciutadania enes ahèrs collectius en tot impulsar eth civisme coma un valor sociau de prumèr orde” e hig que “era participacion ciutadana ei un des elements clau d’ua societat desvolopada e pr’amor d’aquerò sajam d’amiar endauant iniciatives que la prebotgen”.

Era campanha constarà de diuèrses infografies que seràn difonudes enes hilats sociaus e ena plana web der Ajuntament, atau coma en format papèr despartides per punts estrategics de Vielha e Mijaran.

Ath delà, a trauès era App de participacion ciutadana es vesins pòden informar ar Ajuntament sus es incidéncies o desperfèctes que se trapen en municipi.