Cincaua donacion de sang der an ena Val d'Aran
Es donants an baishat pendent aguesta naua donacion mès ei pr'amor que dejà s'arribe ara fin der an e fòrça òmes e hemnes an arribat ath maximom de 4 o 3 donacions ar an
Era Val d’Aran a viscut era cincaua jornada de donacion de sang der an 2025.
Un totau de 48 persones pogueren dar sang des 16:00 entàs 21:00 deth vespe per çò qu’era valoracion ei positiua per part dera Associacion de Donants de Sang dera Val d’Aran. Ath delà tanben se hèren 8 plasmes programadi e 8 aufriments. Rebrembam qu’es aufriments son persones que non poden dar sang per bèra qüestion qu’acostume a èster que prenen quauque medicament o que son baishi de hèr.
Cau auer en compde qu’eth baish numerò de donacions ei pr’amor qu’en trapar-se ena part finau der an, fòrça òmes dejà pòden auer acumulat es 4 donacions maximales qu’ei eth limit mercat, pes 3 des hemnes.
Pendent eth 29 d’octobre d’aguest madeish an ei prevista ua campanha de plasma especiau perqué i a un deficit en aguest tipe d’extraccion. Ua qüestion que non sonque ei a nivèu estatau, mès tanben europèu. Des dera associacion remèrquen qu’era sang non se pòt fabricar e tostemp ei de besonh.
