Desèrta era licitacion tà bastir quate viuendes e 9 places de parcatges en Salardú
Pr'amor des nauti còsti enes materiaus de construccion, non s'an presentat enterpreses interessades. Er ajuntament estúdie dejà naues alternatives d'aguesta licitacion.
Eth concors public entath bastiment d’un edifici de viuendes assequibles en Salardú a demorat desèrt dempús de non presentar-s’i cap d’enterpresa.
Eth projècte, valorat en 916.000 èuros e finançat damb hons municipaus procedenti dera venda de parcèles en Baqueira, contemple era edificacion de quate viuendes naues (dus de dus dormitòris e dus de tres dormitòris, damb superfícies d’entre 75 e 90 m²) e nau places de parcatge ena planta baisha. Eth periòde d’execucion previst ère de 15 mesi, damb eth prètzhèt de qu’es prumèri vesins poguessen entrar-i a víuer en an 2026, a despiet que damb es tèrmes actuaus tot apunte a qu’açò dilhèu non serà possible.
Era abséncia d’aufèrtes tà amiar a tèrme es actuacions supause un contratemps tà un projècte que cerque respóner a un besonh sociau urgent de manca de viuendes entar usatge residenciau a prètzi assequibles.
Er ajuntament aurà de replantejar ara era estratégia entà hèr viabla era promocion de viuendes assequibles ena zòna. En cas qu’acaben d’amiar-se a tèrme, s’adjudicaràn en tot seguir eth madeish sistèma qu’era de Garòs, qu’a arrecebut un dotzeat de sollicituds, quauquarren que met en evidéncia era nauta demanda.