Er Espitau Val d’Aran, entre es centres sanitaris milhor avaloradi de Catalonha

Er Espitau Val d’Aran ven de conéisher es resultats deth Pla d'Enquestes de Percepció, Experiència i Satisfacció (PLAENSA 2025) des usatgèrs deth Servei Català de la Salut, en airau dera atencion espitalèra damb internament. Es conclusions son plan positives, pr’amor que placen ath centre sanitari dera Val d’Aran com un des milhors de tota Catalonha, segontes era opinion des pacients.

En aguest sens, er estudi constate qu’er Espitau Val d'Aran ei ath capdauant en çò que tanh ara tranquillitat entà reposar pera net, ena qualitat deth minjar der espitau, en trobar-se en bones mans, ena informacion coerenta entre professionaus e enes explicacions clares en moment dera nauta. Açò mòstre que i a un naut nivèu de confiança, confòrt e comunicacion entre era equipa sanitària e es pacients. De un aute costat, reflectís un naut grad de fidelizacion, pr’amor qu’un gran percentatge de pacients afirme que tornarie a escuélher aguest espitau.

Aguest reconeishement ei gràcies ath compromís e ara dedicacion des equipes professionaus d’Aran Salut que trabalhen entà aufrir ua atencion espitalèra segura, empatica e centrada ena persona.

Er estudi permet conéisher era experiéncia des pacients enes centres, identificar es airaus d’excelléncia e de milhora, e facilitar informacion entà préner decisions e amiar a tèrme accions en tot auer en compde era vision deth pacient.

En cas der Espitau Val d’Aran, aguest estudi se hec a partir d’un totau de 80 enquèstes que s’an hèt enguan via formulari web, a on es usatgèrs responien a trauès de messatge SMS.

De un aute costat, eth PLAENSA 2025 tanben mòstre prepauses d’accions de milhora com son: eth refòrç de protocòls de consentiment informat damb materiaus visuaus o sessions informatives, e era milhora dera gestion d’abitacions compartides, damb critèris mès personalizadi o milhores ena privacitat.

Entara sindica d’Aran, Maria Vergés: “Eth Govèrn d’Aran trabalhe entà consolidar eth nòste sistèma sanitari e sociau entà qu’era ciutadania dera Val d’Aran compde damb un servici de qualitat que respone as sòns besonhs de present e de futur”.

Atau madeish hig que “eth trabalh des professionaus des servicis sanitaris e des sòns responsables ei indispensable entà mantier aguesta qualitat e eth Govèrn d’Aran tanben les vò arregraïr era sua implicacion en benèster dera societat aranesa”.

“Aran Salut vò felicitar a toti es professionaus que hèn possible aguesti resultats e arregraïr, sincèraments, as pacients e as sues familhes era sua confiança”, soslinhe era directora deth Servici Aranés de Benèster e Salut (SABS), Maria Àngels Borràs. E hig que: “seguiram trabalhant tà milhorar cada dia, damb er objectiu de garantir ua atencion espitalèra excellenta e umana”.


HÒNT: CONSELH GENERAU D'ARAN/ARAN SALUT