Er Institut d’Estudis Aranesi – Acadèmia Aranesa dera Lengua Occitana daurís ua delegacion en Barcelona
Barcelona compdarà per prumèr còp damb era preséncia establa de dues acadèmies de lengua oficiau de Catalonha, era catalana e era aranesa. Era naua sedença, plaçada laguens der Institut d’Estudis Catalans, devierà un centre de projeccion academica, culturau e sociau entara lengua occitana
Eth procès de dubertura includirà tres estapes claus que s’esteneràn entre octobre e deseme: era inauguracion deth 3 d’octobre, era prumèra session plenària deth 4 d’octobre e er acte de clauson deth 12au cors academic eth 18 de deseme.
Er Institut d’Estudis Aranesi – Acadèmia Aranesa dera Lengua Occitana (IEA-AALO) a inaugurat aué era sua delegacion a Barcelona, ua hita istorica que refortilhe era preséncia e projeccion dera lengua occitana en Catalonha. Damb aguesta dubertura, eth caplòc catalan acuelh, peth prumèr còp, es dues acadèmies de lengua oficiau deth país —era catalana e era aranesa— e se consolide coma epicentre culturau e lingüistic de referéncia.
Era naua sedença, plaçada laguens der Institut d’Estudis Catalans (IEC), establirà ua relacion mès agila damb es institucions e aufrirà un espaci estable entà activitats academiques, culturaus e de difusion der occitan. Er objectiu ei apropar eth trabalh dera Acadèmia ara societat catalana e garantir ua projeccion mès grana dera lengua d’Aran, arreconeishuda oficiaument en tot Catalonha des de 2006.
Aguest procès de dubertura s’articule en tres cites institucionaus que s’esteneràn entre octobre e deseme. Era inauguracion d’aué, qu’a compdat damb era participacion deth conselhèr de Politica Lingüistica, Francesc Xavier Vila, e deth vicepresident 2au dera Deputacion de Barcelona, Dionís Guiteras, n’a estat eth punt de partida, e eth calendari contunharà deman, 4 d’octobre, damb era prumèra session plenària dera Academia enes naues installacions e culminarà damb er acte de clauson deth 12au cors academic, prevista entath 18 de deseme en Barcelona.
HÒNT: IEA-AALO
