Es Corbilhuèrs de Les complissen 75 ans
En tot hestejar aguesta ita, se hèc ua mòstra de teatre, dances e reconeishements per part des Corbilhuèrs de Les en ua serada que compdèc damb ua assisténcia d'ath torn de 500 persones
Aguest fin de setmana s’a desvolopat ena poblacion d’un Les un acte en commemoracion deth 75au aniversari des Curbilhuèrs de Les, un des grops dançaires dera Val d’Aran e qu’enguan arribaue ad aguesta ita, tot un succès en tot auer en compde que formen part deth patrimòni culturau deth territòri e que s’an dedicat a difóner er auviatge d’Aran per a on an anat.
Des der Ajuntament de Les s’a felicitat as Curbilhuèrs per aguest procès istoric e per èster un grop gessut des d’aguesta madeisha poblacion en ua iniciativa d’uns quanti vesins e que s’a prolongat en temps enquia dia d’aué.
Pendent er acte, s’amièren a tèrme dances, autant coma ua petita mòstra de teatre en ua jornada qu’amassèc a ath torn de 500 persones en aguest parçan deth Baish Aran.
Totes es còlhes dançaires dera Val d’Aran que dancen actuauments, que son, era Còlha Santa Maria de Mijaran, es Fradins de Vielha e es Sautarèths de Bossòst volèren èster ath cant des Curbis, en ua serada de rebrembre que perdurarà en temps.
Era ròba que pòrten es diuèrsi grops dançaires represente era ròba de trabalh autant coma era ròba de hèsta que se portaue antigaments per çò qu’a ua grana importància de mantier aguesta tradicion damb es esclòps e d’auti elements tipics.
