Eth castèth de Pijoèrt de Les, laguens deth Hilat de Musèus dera Val d'Aran
Eth Conselh Generau s'ocuparie de tota era contractacion, promocion e comunicacion, mentre qu'eth consistòri deth manteniment dera Casa deth Haro, accèssi ath castèth e enlumenat
Eth Conselh includís ath Castèth de Pijoèrt de Les laguens deth Hilat de Musèus d’Aran gràcies a un acòrd damb er Ajuntament de Les.
Eth Conselh assumís era direccion tecnica e coordinacion des equipaments, e tanben es despenes de foncionament, personau e activitats, e survelharà era aplicacion dera normativa vigenta en matèria de musèus, patrimòni e arqueologia. Atau madeish, elaborarà es materiaus divulgatius en diuèrses lengües e formats, se n’encuedarà dera comunicacion e promocion, e definirà es tarifes e es accions deth plan estrategic.
Er Ajuntament de Les, peth sòn costat, se responsabilizarà dera neteja ordinària dera Casa deth Haro, dera conservacion des camins d’accès, e dera illuminacion deth Castèth. Tanben collaborarà ena dignificacion e adequacion des entorns des dus equipaments.
Eth Conselh Generau d’Aran dejà hec ua aportacion de 125.000€ ena prumèra fasa de reabilitacion deth Castèth de Les, ues òbres qu’aueren un còst totau de 321.000€. Ara se daurís era dusau fasa d’aguestes òbres que comprenerà era museizacion de tot aguest espaci, damb un pressupòst d’uns 100.000 èuros.
