Eth Club Curling Val d'Aran recebut pes autoritats politiques
Era equipa dejà premanís era fasa finau dera temporada
Eth Club Curling Val d’Aran, que tot just hè uns dies qu’a artenhut er ascens ara prumèra Division Espanhòla, siguec recebut pes autoritats politiques araneses. Era hita obtenguda dempús de guanhar ena finau deth campionat dera 2au Division contra eth Puigcerdà, ben ben meritaue un reconeishement en país. Ua victòria plan importanta dempús de fòrça trebalh e esfòrç ath long der an.
Es jogadors s’entrenen enes installacions deth Palai de Geu de Vielha, en tot cercar milhorar es tempsi e non tier en compde massa er estat dera pista. En tot èster minoritari, non an guairi recorsi, mès era illusion que meten ei çò que les permet arténher hites coma aguesta. Ara lis manque finalizar era Liga de Catalonha, a on encara manquen diuèrses jornades, en tot cercar ua plaça entà disputar era Copa d’Espanha qu’aurà lòc en Puigcerdà en mes de mai.
Cau remercar qu’eth Club Curling Val d’Aran tanben dispòse d’ua equipa femenina que dejà a començat a competir, en tot cercar arribar ath maxim public possible, sense desbrembar era igualtat de sexes en espòrt.