Eth govèrn d’Aran presente era IIau edicion der Hestau Culturau “TerSon, eth son dera tèrra”
Eth Conselh Generau d’Aran organize aguest Hestau as entorns dera Hèsta d’Aran entà impulsar e méter en valor era Hèsta deth 17 de junh en tot proposar ua programacion damb actes culturaus, sociaus e gastronomics tà tota era ciutadania
Era sindica d’Aran Maria Vergés, a presentat aguesta tarde eth cartèl oficiau dera IIau edicion“TerSon, eth sòn dera tèrra”, que forme part deth programa dera Hèsta d’Aran d’enguan, der 11 ath 17 de junh en reconeishença ara cultura, era lengua e era musica pròpria dera Val d’Aran e qu’a coma objectiu dignificar e apropar ara ciutadania aguesta data tant importanta entath nòste territòri.
A trauès d’un ample calandari d’activitats culturaus, musicaus e institucionaus, eth TerSon d’enguan vò mostrar, un viatge mès era vitalitat dera societat aranesa e rebrembar era importància deth dia 17 de junh. Atau madeish, se preven activitats e actuacions entà tot tipe de public, entà apropar-les era activitat e actuacions culturaus ara societat aranesa.
HÒNT: CONSELH GENERAU D'ARAN
