Eth Palai de Gèu de Vielha a aufrit aguesta setmana jornades de pòrtes dubèrtes as pairs entà participar enes corsi de natacion damb es sòns hilhs

Pendent tota aguesta setmana, eth Palai de Gèu de Vielha a aufrit sessions de pòrtes dubèrtes as pairs e mairs des alumnes que prenen part des corsi de natacion setmanaus d’aguesta installacion municipau de Vielha e Mijaran.


De deluns a diuendres, en dus torns (de 17:20 a 18:05 e de 18:10 a 18:55), es pairs e mairs que vòlen, an participat damb es sòns hilhs e hilhes enes classes de natacion qu’impartissen abituaument es monitors des piscines. En aguest sens, es sessions se compausen d’ua estona damb activitats entà qu’era mainadèra aprene a nadar e ua dusau fasa ena que grani e petiti poguen compartir amassa diuèrses activitats autant ena piscina petita coma ena grana.

D’aguesta manèra se preten fomentar qu’era natacion sigue ua activitat familhara e que poguen vier en d’auti moments as piscines a nadar amassa.

“Es corsi de natacion son un succès an darrèr an, e damb aguestes jornades de pòrtes dubèrtes, des der Ajuntament de Vielha e Mijaran animam as pairs e mairs a que venguen a gaudir des piscines deth Palai de Gèu damb es sòns hilhs, pr’amor que de ben segur s’ac passaràn fòrça ben e voleràn vier, per exemple, enes dimenjades”, comente eth dusau tinent d’alcalde de Vielha e Mijaran, e còsso d’espòrts, Alberto López.


HÒNT: AJUNTAMENT VIELHA E MIJARAN