Eth secretari d’Estat de Torisme visite era Val d’Aran
23/03/2022
Era sindica d’Aran, Maria Vergés, recebec ager a Fernando Valdés, secretari d’Estat de Torisme deth govèrn d’Espanha, e s’amassèc damb representants d’ATUDEM, era associacion d’estacions d’esquí d’Espanha entà tractar sus era situacion e es rèptes deth sector dera nhèu
Ager ath vèspe, era sindica d’Aran, Maria Vergés, e es conselhèrs de Torisme, Juan Antonio Serrano e Josep Canut, s’amassèren damb eth secretari d’Estat de Torisme, Fernando Valdés, eth secretari generau tath Rèpte Demografic, Paco Boya e diuèrsi representants d’ATUDEM, era associacion d’estacions d’esquí d’Espanha, en ua session de trabalh tà tractar sus era situacion e es rèptes deth sector dera nhèu.
Pendent era trobada, era sindica d’Aran, amassa damb es conselhèrs de Torisme, informèren ath secretari d’Estat dera evolucion des projèctes e accions previsti en Plan de Sostenibilitat Toristica, finançat peth madeish Ministèri d’Indústria, Comèrç e Torisme, era Generalitat de Catalunya e eth Conselh Generau d’Aran.
Era sindica d’Aran a manifestat era sua satisfaccion pera visita deth secretari d’Estat e li a arregraït: “era deferéncia cap ara Val d’Aran per auer agut aguesta trobada e poder collaborar damb es estacions d’esquí nacionaus entà hèr a conéisher era sua realitat e es rèptes de futur que plantegen”. E higie que: “ei eth prumèr viatge qu’un secretari d’Estat de Torisme visite era Val d’Aran, e açò mos permet transméter es rèptes toristics que presente eth nòste territòri”.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga