Gran succès d’assisténcia ena hèsta des 75 ans d’Es Corbilhuèrs de Les

Era Associacion Es Corbilhuèrs de Les celebrèc aguest dissabte es mès de 75 ans de dances araneses damb ua hèsta commemorativa tà méter en valor era aportacion culturau e musicau de totes aqueres persones que der an 1948 ençà an mercat eth camin dera creacion folklorica ath torn dera hèsta deth huec.

Enes actes programadi peth maitin se poderen visitar dues exposicions, ua ath torn des lengües minoritàries e, era auta, un recorrut fotografic pera istòria des dances tradicionaus en pòble de Les.

Era còlha anfitriona recebec, ena tarde, ena plaça deth Pònt, ara rèsta de còlhes d’Aran: era Còlha de Santa Maria de Mijaran, es Fradins de Vielha e es Sautarèths de Bossòst, e ara seguida se hec ua demostracion de dances de toti es participants.

Ara seguida, es Corbilhuèrs aufriren un espectacle de dança e musica, qu’aumplic era sala polivalenta. Era jornada se barrèc damb un concèrt de musica a cargue deth grop Sarabat, dempús d’un sopar daurit ath public.

Eth Conselh Generau d’Aran vò felicitar ara Associacion Es Corbilhuèrs per aguest acte commemoratiu e as persones de Les qu’an mantengut viues es tradicions, es dances e era musica araneses ath long d’aguesti mès de 75 ans d’istòria.


HÒNT: CONSELH GENERAU D'ARAN