Grison inície eth cicle de Dimenges en Familha de Bagergue
Eth mès que popular beatboxer, collaborador deth programa de 'La Revuelta' de TVE, ha estreat Dimenges en Familha dauant de mès de 700 persones. Un succès qu'apròpe era cultura as vesins d'Aran.
Era Entitat Municipau Descentralizada de Bagergue, ena Val d’Aran, a estreat eth cicle culturau de Dimenges en Familha. Aguestes jornades an coma objectiu apropar era cultura entre es joeni e familhes que son residents autant coma es que visiten eth territòri pendent er ostiu.
Ena prumèra des actuacions que s’a amiat a tèrme, en tot coincidir damb era hestivitat de Santa Margalida, ua des hèstes majors de Bagergue, a estat era deth beatboxer professionau e collaborador deth programa La Revuelta de TVE, Grison.
Mès de 700 persones s’amassèren ena Plaça Planhèra per çò qu’era valoracion siguec excepcionau en un scenari que se premanic e se dressèc de gala entà aguesta escadença especiau. Un public joen, mès tanben d’edat mès adulta gaudic de mès d’ua ora d’umor autant coma improvisacion e musica alternativa.
Aguest cicle de Dimenges en Familha ei organizat pera EMD, en collaboracion der Ajuntament de Naut Aran, Institut d’Estudis Ilerdencs, Deputacion de Lhèida e Generalitat de Catalonha.
