Huec en Salardú damb afectacion en dus blòcs de pisi

Pendent eth media d’aguest dijaus s’a produsit un huec en un blòc de pisi en Salardú, en Naut Aran, en parçan de Pujo.

Era intensitat e fòrça deth huec a generat ues imatges de preocupacion e pòur mès, per sòrt, sonque s’an auut de planhar damatges materiaus, que son considerables sustot ena part nauta des blòcs de pisi, qu’ei a on s’a originat eth huec.

Per ara, es causes qu’a provocat aguest fenomen se desconeishen, mès non s’escarte cap tipe d’ipotèsi exceptat der intencionat. 

Eth grop de Pompièrs e Emergéncies s’a aproximat ara zòna afectada damb grana celeritat damb diuèrses dotacions e an artenhut de controlar eth huec e lèu escandir-lo en un periòde d’ath torn de 2 ores. Es manguères de longa distància des de diuèrsi punts de contacte an permetut un màger contròl dera situacion pr’amor deth desconeishement dera situacion en interior dera bastissa.

Era incidéncia a talhat es accèsi a Pujo e s’a restablit era normalitat viària damb eth pas des ores.