Naut Aran premanís un libre sus microtoponimia des entorns des sòns pòbles
A on se veirien contemplades hònts, cabanes, finques e d'auti emplaçaments que delimiten es pòbles des diuèrsi entorns deth municipi. Naut Aran compde damb mès de 250 km2 d'extension totau.
Er Ajuntament de Naut Aran premanís un libre sus microtoponimia des entorns deth municipi. Aguest besonh respon ath hèt de poder mantier viui toti aqueri nòms de diuèrsi emplaçaments coma hònts, barratges o cabanes que son antigui, de vesins de tota era vida de mès de dues generacions e que non se vò pérder pera manca d’usatge en futur.
Actuauments, dejà existís un Nomenclator dera Val d’Aran a on son contempladi toti es barrancs, ribères, cabanes o pics, entre d’auti, mès ara eth consistòri vò elaborar era sua microtoponimia des entorns des pòbles deth municipi entà hèr mès visible aguesta qüestion. Naut Aran compde damb ua extension de 255 km2, per çò qu’era dificultat de poder amiar endauant un document d’aguestes caracteristiques ei tanplan naut.
Pòbles coma per exemple eth de Les, en Baish Aran, compde damb ua microtoponimia pròpria, mès aguest libre a estat fòrça mès facil d’executar pr’amor dera extension d’aguest parçan.
Toti es entorns des pòbles deth municipi de Naut Aran se veiràn representadi laguens d’aguesta microtoponimia que pòt esdevier un referent tara rèsta d’endrets deth territòri.
