Tòn Cònsul e Alexanne Bouillon finalizen 16aus en Campionat deth Mon Júnior de Patinatge Artistic

Meritòria 16au posicion era qu'a artenhut era parelha respresentanta d'Espanha, damb er aranés Tòn Cónsul e era canadenca Alexanne Bouillon, en Campionat deth Mon Júnior celebrat en Taipei (China). Aué se disputaue eth programa long e fin finau an repetit eth resultat deth passat dimèrcles en programa cuert, quan dejà finalizèren ena 16 au posicion. En programa long era puntuacion a estat de 65,52 punts e somat as 40,07 punts deth programa cuert, an obtengut 105,59 punts en totau. Era victòria a estat entara parelha australiana, e eth pòdium l'an completat Rússia e China. 

Aguest a estat un pas mès ena evolucion esportiva de Tòn Cónsul, que cada viatge auance damb pas fèrm cap ara professionalizacion en patinatge artistic. Se ben aguesta a estat ua bona manèra de finalizar eth campionat, Tòn dejà mostrèc eth sòn decebement per non auer podut competir ena modalitat individuau per decision dera direccion espanhòla, quan eth joen patinador aranés auie artenhut aguest merit en tot guanhar eth Campionat Espanhòu celebrat en Vielha eth passat mes de deseme. 

Enes pròplèus mesi, Tòn Cónsul contunharà en tot entrenar e premanir es competicions ena modalitat júnior. Coma dejà comentèc Tòn "encara me queden 3 ans ena modalitat per parelhes, e contunharè ena aguesta categoria per ara".