Torne era nhèu ena Val d'Aran

Prumèra nheuada dera sason ena Val d’Aran. Es temperatures an queigut drasticaments e an propiciat es prumères precipitacions en forma de nhèu dera tardor.

Pendent aguesta net, era nhèu a hèt acte de preséncia enes còtes nautes deth territòri, en tot pintar de blanc eth paisatge, en emplaçaments coma, per exemple, eth Pòrt dera Bonaigua a mès de 2.000 mètres de nautada.

Era pròpria estacion d’esquí de Baqueira Beret dejà a compartit tanben quauques imatges a trauès des hilats sociaus a on se pòt apreciar aguest fenomen a mès de 2.500 mètres de nautada enes que s’aurien acumulat entre 5 e 8 centimètres, segontes an informat.

Era prevision indique qu’aguest dimars ena net poderie baishar era còta enquais 1.300 mètres e, londeman, eth dimèrcles 24 de seteme i aurie un 20% de probabilitats de nheuada ena còta 1.600 damb temperatures mès baishes qu’es d’aguesta jornada.

Un bon inici de tardor que confirme era bona tendéncia enes darrèrs ans d’arrecéber nheuades en mes de seteme.