Viatjam peth mon ena Gala dera Escòla de Patinatge de Vielha

Eth passat dissabte es alumnes dera Escòla de Patinatge de Vielha mos èren un recorregut per diuèrsi païsi deth mon damb es sues actuacions.

Ena sua gala de finau de cors, es joeni patinadors e patinadores interpretèren diuèrses cançons damb ua tematica internacionau entà hèr gaudir ath public der espectacle.

Des deth Palai de Gèu de Vielha, eth public auec eth plaser de viatjar a Itàlia, Estats Units, Japon, Cuba o França, entre d’auti, dera man d’aguesti joeni esportistes qu’an trebalhat fòrça dur pendent eth cors entà milhorar era sua tecnica e arribar çò de mès luenh possible en aguest espòrt.

Aguest a estat un magnific an estàs patinadors deth Club d’Espòrts de Gèu Val d’Aran. Des deth començament deth cors an participat en infinitat d’eveniments e an artenhut 13 pòdiums ena Copa CEGVA, 3 aurs en Open Ciutat de Jaca, un tresau lòc en Open d’Andòrra, 12 pòdiums ena Copa Puigcerdà, set mès ena Copa Vielha e prumèra fasa deth Campionat de Catalonha, 5 ena dusau fasa e 10 ena Copa Canillo, Cim d’Andòrra e Nacionau.

En aguest listat d’èxits cau híger tanben qu’en Nadau es patinadors aranesi inaugurèren era pista de gèu dera Plaça Sant Joan de Lhèida damb ua animada exibicion e que nau des patinadores deth club sigueren seleccionades entà participar en Campionat d’Espanha e Copa Federacion, qu’auec lòc en Puigcerdà a finaus d’abriu.

Rebrembam tanben qu’eth Palai de Gèu de Vielha auec er aunor d’acuélher eth Campionat d’Espanha, a on participèren es milhors patinadors deth país, inclodint  Javier Fernández e er aranés Tòn Cónsul, atau coma era prumèra fasa deth Campionat de Catalonha.

Un gran an entàs nòsti patinadors que, de ben segur, contunharàn trebalhant eth pròplèu cors entà arribar encara mès luenh.