Vielha e Mijaran inscriu un solar de Betren ena resèrva publica de solars catalana entà viuendes protegides

Vielha e Mijaran a inscrit un solar ena prumèra convocatoria dera resèrva publica de solèr dera Generalitat de Catalunya, damb capacitat entà mès de 70 viuendes protegides.

Aguest solar se trape en parçan dera Tuca (Betren) en ua superfícia totau de 5.260,02 m².

Des der Ajuntament de Vielha e Mijaran tostemp i a auut era volontat de facilitar e méter es solars a disposicion des administracions publiques e entitats privades entà poder-i bastir viuenda assequibla e en aguesta prumèra convocatòria dera Generalitat de Catalunya auferim eth solar damb era capacitat més nauta de construccion.

 “Vielha e Mijaran a un grèu problèma d’accès ara viuenda e des der equip de govèrn municipau trabalham entà trapar solucions ad aguesta problematica. Des deth consistòri trabalham amassa damb eth Conselh Generau d’Aran e damb d’auti municipis damb qui compartim era participacion ena Taula d’Abitatge, entà definir es estratègies e accions de besonh tà dar gessuda ara actuau problematica der abitatge en territòri e garantir-ne er accès accessible e de besonh entara populacion resident”, comente eth baile de Vielha e Mijaran, Juan Antonio Serrano. E ahig que “seguiram en tot méter facilitats en aguest ahèr entà qu’enes solars aufrits si pogue bastir viuenda sociau. Aguest solar pòt arribar a generar ua setantia d’abitatges, apruprètz, d’aguest tipe en municipi”.