Aran reclame eth reconeishement efectiu dera sua singularitat

23/01/2025

Era sindica d’Aran a iniciat aguesta setmana era ronda de contactes damb es grups politics deth Congrès entà trasladar-les eth besonh qu’er Estat reconeishe de forma efectiva era singularitat e autogovèrn aranés en tot impulsar era reforma normativa de besonh tà qu’eth Conselh Generau d’Aran dèishe d’èster considerat juridica e administrativaments coma ua administracion locau

Era sindica d’Aran, Maria Vergés, a amiat a tèrme diuèrses amassades en Madrid damb grups politics deth Congrès des Deputats, damb eth doble objectiu de, per un costat, hèr a conéisher era realitat politica d’Aran e, per aute, eth de trasladar eth besonh urgent de qu’er Estat reconeishe de manèra efectiva era singularitat aranesa e era sua autonomia politica. Ath long d’aguesta setmana, era sindica d’Aran s’a amassat damb es grups deth PNV, ERC, PSOE, Coalición Canaria e PP, en tot preveir es trobades damb era rèsta de grups pendent es pròplèu dies. 

Aguestes amassades an servit entà trasladar as grups parlamentaris era actuau situacion dera maxima institucion d’Aran que, tot e compdar damb un naut reconeishement institucionau e politic en Catalunya, a de besonh qu’era sua singularitat se veigue tanben reconeishuda de manèra efectiva a nivèu juridic e administratiu laguens der Estat. En aguest sens, era sindica d’Aran a manifestat que, “era Val d’Aran ei ja er unic territòri der Estat que non a aguest reconeishement dera sua singularitat, quauquarren qu’actuauments, met en risc era pròpria atencion as besonhs dera nòsta societat”, en tot híger que “ath delà de que se contraditz aquerò que mandate er Estatut d’Autonomia e era Lei d’Aran respècte deth nòste autogovèrn, mos trobam deuant deth risc de collapse qu’impedisque era corrècta gestion des servicis publics en Aran”


Atau madeish, era sindica d’Aran mantenguec tanben ua trobada institucionau damb era presidenta deth Congrès, Francina Armengol, a qui tanben trasladèc totes aguestes qüestions.
Era sindica d’Aran a volut tanben arregraïr era predisposicion des grups deth Congrès entà escotar e balhar supòrt ad aguesta reclamacion institucionau.


HÒNT: CONSELH GENERAU D'ARAN
Manu Moga