Naut Aran a creat ua via herrada tà iniciacion en Arties

23/01/2025

En responsa a ua demana d'enterpreses deth territòri e agéncies de viatges

Er Ajuntament de Naut Aran a bastit ua quatau via herrada enes entorns dera poblacion d’Arties. En aguesta escadença se tracte d’ua via herrada enfocada entà principiants e qu’aurà eth nòm de “Eth Petit Taro”. Eth nivèu d’aguesta, serà de K2, fòrça inferior as autes coma poderien èster “Eth Taro”, d’un nivèu intermiei, o Circ dera Lua e Circ deth Solei de K7 e K7+ que son es mès exigentes de tota Espanha.

Era enterpresa especializada de Pont de Suert s’a encuedat de hèr tot eth montatge dera infraestructura e serà prèsta en ues pògues setmanes un viatge arribe eth pannèu informatiu damb es mesures de seguretat en montanha.

Eth consistòri a amiat a tèrme aguesta accion dempús d’ua peticion populara a on se demanaue ua via herrada d’un nivèu d’iniciacion e tanben damb eth prètzhèt de desestacionalizar era zòna.

Cau rebrembar qu’en Naut Aran i a ua auta via herrada ena poblacion d’Unha, nomentada Poi d’Unha qu’ei tanplan visitada pr’amor des espectaculars vistes qu’aufrís.

Àlvar Ordoñez