Eth Conselh Generau a presentat as ajuntaments aranesi es resultats dera prumèra diagnòsi encomanada peth govèrn , qu’a de servir de referéncia entà conéisher era actuau situacion der abitatge en Aran e es prumères accions a desvolopar.

Era prumèra prepausa per part deth govèrn aranés, passe pera creacion d’ua taula de trabalh d’abitatge conjunta entà consensuar es politiques entà amiar a tèrme . Ua des prumères actuacions, enes què ja se trabalhe, ei consolidacion dera Oficina d’Abitatge dera Val d’Aran. Actuauments s’emplegue en ahèrs sociaus en tèmes de exclusion tanben en ajudes ara reabilitacion e eficiéncia energetica. Era volentat ei tanben meter en marcha ua pròva pilòt d’ua bossa d’abitatge de loguèr entà trincar damb era dinamica actuau copada pes abitatges d’ús toristic.

Era creacion d’ua taula de trabalh s’emmèrque enes negociacions damb era Generalitat entath  desvolopament deth traspàs competenciau en aguesta materia, reclamat peth Conselh Generau de hè lèu dus ans. Eth govèrn d’Aran a criticar un viatge mès eth pòc finançament damb eth que compde actuauments en aguesta matèria.