Er Ajuntament de Naut Aran seguís en tot dar peades entà bastir eth sòn parc de viuenda particular. Dempús des actuacions ena viuenda des antics mèstres de Garòs, en aguesta sonque manque a dia d’aué un petit tramit adminstratiu entà que poguen començar a apuntar-se es familhes ena bossa de viuenda que creèc eth consistòri mesi endarrèr e qu’autrejarà de forma objectiva eth loguèr d’aqueth endret pendent un periòde de 5 ans.

Cau rebrembar qu’er Ajuntament a destinat mès de 65.000 èuros ara reforma integrau dera antiga viuenda des mèstres que compde damb ua superfície de 80m2 e que compdarà damb 2 abitacions, 1 banh, salon, codina e ua petita zòna tà sauvar objèctes.

D’un aute costat, Naut Aran dejà son a punt d’iniciar es òbres deth dusau pis qu’aufrirà as vesins deth municipi, plaçat en Tredòs, e ath cant dera escòla Mairau Eth Cargolh.  2 dormitoris, 1 banh, salon minjador e codina damb ua superfícia totau de 100 m2. 

Es condicions seràn es madeishes respècte era viuenda de Garòs e era idèa ei qu’ath long deth 2025 dejà pogue entrar a víuer ua familha en aguesta viuenda.