Er Ajuntament de Naut Aran a aprovat ua partida immediata e extraordinària de 10.000 èuros entàs afectadi peth huec que s’a produsit aguest meddia en carrèr Bodigues, entà que poguen crompar causes de prumèr besonh, poder èster lotjadi en otèls, auer minjar e quinsevolh aute besonh que sigue fonamentau.

A compdar de deluns, es servicis tecnics e brigada auràn prioritat absoluta entà ajudar en rebastiment des estructura mejançant era elaboracion de projèctes en un procès en qu’er ajuntament i serà molt implicat e qu’aurà tota era agilitat administrativa possible.


Per sòrt, sonque i a auut damatges materiaus, mès des deth consistòri volem aufrir tot eth nòste supòrt as familhes e vesins qu’an patit aguesta situacion.


Volem destacar era grana collaboracion vesiau que s’a aufrit des deth prumèr moment en que s’a iniciat eth huec. E tanben ath grop de @pompiers_emergencies pera rapida responsa entà escandir eth huec.


A nivèu informatiu, s’a creat un grop de Whatsapp entà ajudar as afectats deth huec.


HÒNT: AJUNTAMENT DE NAUT ARAN