Naut Aran e concretament era poblacion de Unha damb eth sòn Musèu dera Nhèu acuelh pendent aguest mes de mai e enquia arribar en Sant Joan en junh era exposicion “100 ans dera Òbra deth cançonèr popular de Catalonha”.

Ath delà des estrictes cançons que se pòden trapar laguens de tota era mòstra, eth prètzhèt principau ère eth d’amassar dances, entremesi, rondèus, legendes, arrepervèris, jòcs e instruments musicaus.

En cas dera Val d’Aran i pren especiau relèu era figura de Palmira Jaquetii, ua des comisaries que venguec a remassar cançons en poblacions coma Gessa, Salardú, Unha o Bagergue. I a ua grana documentacion musicau. 

I a donades que Jaquetti demorèc en Salardú entà poder hèr aguest remàs de cançons tipiques dera Val d’Aran e un exemple ei eth que se pòt escotar en Musèu dera Nhèu de Unha. De hèt, era exposicion s’estreèc en municipi de Naut Aran en tot coincidir damb er aniversari dera mòrt de Jaquetti e se pòt visitar de forma gratuïta ath long de tot aguesti periòde enquia Sant Joan.